UTUTA WAZUKA KUHUSU HATMA YA MAMA ALIYEASI DINI NCHINI SUDAN

Meriam na watoto wake kizuizini Sudan

Mume wa mwanamke aliyehukumiwa kifo nchini Suudan kwa kosa la kuasi dini ya kiisilamu, ameambia BBC kuwa hajafahamishwa kuhusu mpango wa kumwachilia mkewe.

Ripoti zilizotolewa Jumamosi ziliarifu kwamba afisa mmoja wa serikali alithibitisha Meriam Ibrahim, aliyejifungua mtoto akiwa kizuizini ataachiliwa katika siku chache zijazo.

 

Lakini wizara ya mambo ya nchi hiyo imesema kuwa Bi Ibrahim anaweza tu kuachiliwa ikiwa kesi yake ya rufaa itafanikiwa.
Taarifa za hukumu ya kifo iliyotolewa kwa mwanamke huyo, zimeikera sana jamii ya kimataifa.

Meriam na mumewe ambaye anasema hana habari ikiwa mkewe ataachiliwa

Bi Ibrahim, alilelewa na mama aliyekuwa mkristo, lakini mahakama ilimhukumu kifo ikisema kuwa anapaswa kuwa muisilamu, hiyo ndiyo iliyokuwa dini ya babake.
Alikataa kusilimu na kusema kuwa yeye ni mkristo na hivyo anakabiliwa na hukumu ya kunyongwa kwa kosa la kuasi dini.
Naibu waziri wa mambo ya nje wa Sudan, Abdullahi al-Azreg, aliambia BBC Jumamosi kwamba, Bi Ibahim ataachiliwa huru kwani serikali ya Sudan inawapa watu uhuru wa kuabudu na hivyo iko tayari kumlinda.
Mumewe Meriam Daniel Wami, alisema kuwa taarifa za mkewe kuachiliwa ambazo amezisikia kupitia vyombo vya habari, ni kama uvumi tu.
“Hakuna afisa yeyote wa serikali amewasiliana nami. Labda kuna mashauriano kati ya serikali na maafisa wa kigeni, ikiwa ni hivyo taarifa hizo mimi sina,’’ alisema Daniel.
“Mimi nitasubiri tu kesi ya rufaa ambayo mawakili wamewasilisha, na ninatamani kuwa mke wangu ataachiwa huru.’’ BBC