Idadi ya watu duniani kufika bilioni 10 mwaka 2050

Ripoti ya Umoja wa Mataifa inakadiria idadi ya watu India itaipiku ya China katika kipindi cha miaka saba ijayo na Nigeria inatarajiwa kuipiku Marekani na kuwa taifa la tatu duniani lenye idadi kubwa ya watu ifikapo 2050

Ripoti hiyo iliyotolewa na idara ya uchumi na masuala ya kijamii ya shirika la  kushughulikia idadi ya watu duniani katika Umoja wa Mataifa inakadiria kuwa idadi ya hivi sasa ya watu duniani ya takriban bilioni 7.6 itaongezeka hadi watu bilioni 8.6 ifikapo mwaka 2030, bilioni 9.8 ifikapo 2050 na bilioni 11.2 ifikapo mwaka 2100.
Inaripotiwa kuwa karibu watu miliioni 83 wanazaliwa duniani kila mwaka, dalili zinaoonyesha ongezeko litakaloendelea hata kama viwango vya uzazi vitashuka kama inavyoshuhudiwa tangu miaka ya 1960.

John Wilmoth, mkurugenzi wa kitengo hicho cha idadi ya watu amesema ripoti hiyo imekusanya takwimu kutoka mataifa 233 au maeneo duniani na kuongeza idadi ya watu barani Afrika inakua kwa kiwango cha kasi na inatarajiwa nusu ya idadi ya watu duniani kati ya sasa hadi mwaka 2050, itatoka katika bara hilo.

Wanawake wajawazito wa Afrika

Kwa upande mwingine, idadi ya watu barani Ulaya itapungua katika kipindi cha miongo kadhaa ijayo. Shirika hilo la Umoja wa Mataifa limebashiri kuwa kuanzia sasa hadi mwaka 2050 idadi ya watu itaongezeka hususan katika mataifa haya:
India, Nigeria, Congo, Pakistan, Ethiopia, Tanzania, Marekani, Uganda na Indonesia. Katika kipindi hicho hicho, idadi ya watu katika mataifa 26 ya Afrika itaongezeka karibu mara mbili. Nigeria ambayo hivi sasa ni nchi ya saba duniani iliyo na watu wengi, inashuhudia ukuaji wa kasi wa idadi ya watu na ripoti hiyo ya Umoja wa Mataifa inakadiria itaipiku Marekani muda mfupi kabla ya kufikia nusu karne.
China hivi sasa ndiyo inayoongoza kwa idadi ya watu ikiwa na watu bilioni 1.4, ikifuatiwa na India iliyo na watu bilioni 1.3. Ifikapo 2024, India inatarajiwa kuipiku China. Ripoti hiyo inasema kuwa uzazi umepungua kwa takriban kila eneo katika kipindi cha miaka ya hivi karibuni.
Nchi kumi zilizo na idadi kubwa ya watu hivi sasa lakini zina viwango vya chini vya uzazi ni China, Marekani, Brazil, Urusi, Japan, Vietnam, Ujerumani, Iran, Thailand na Uingereza. Mbali na kupungua kwa ukuaji wa idadi ya watu, viwango hivyo vya chini vya uzazi vimesababisha kuongezeka kwa idadi ya wazee.

Mtoto mchanga wa Ufilipino

Idadi ya watu walio na  umri wa kuanzia miaka 60 na kuendelea itaongezeka kutoka watu milioni 962 hivi sasa hadi watu bilioni 2.1 ifikapo 2050. Robo ya idadi ya watu barani Ulaya tayari wana umri wa miaka 60 na zaidi.
Hata hivyo bado kuna pengo kubwa kati ya mataifa maskini na matajiri katika suala la usawa. Makadirio ya umri wa mtu kuishi katika mataifa tajiri inazidi 80 huku watu wanaoishi Afrika wanatarajiwa kuishi hadi umri wa miaka 50.
Mwandishi: Caro Robi/ap/afp wa DW
Mhariri: Mohammed Abdul-Rahman