Ashtakiwa kwa kuendesha gari akiwa amesimama: Boda boda kazi kwenu!

 Adam Elliott ameshtakiwa kwa kuendesha gari akiwa amesimama

Mtu mrefu ameshtakiwa kwa kuendesha gari akiwa amesimama baada ya kukiri kupeleka gari vibaya.

Adam Elliott alituhumiwa kwa kuwaonyesha madereva wengine kichwa chake kikiwa kinaonekana juu ya paa la gari hilo aina ya Ford Ka.
Elliott mwenye umri wa miaka 26 kutoka mji wa Newcastle, ambaye ana urefu wa mita mbili alikiri kufanya makosa hayo katika mahakama ya Newcastle lakini akalaumu urefu wake.

Akizungumza baada ya kesi hiyo, alisema: Sikuwa nimesimama, mimi ni mrefu ndio maana.
Jaji Robert Adams alisema kuwa ni wazi kwamba Adam alitaka kuonekana akiendesha gari akiwa amesimama ili kuonyesha urefu wake.
''Ilikuwa kitu hatari sana kufanya'',alisema.

APOTEA NJIA NA KUENDESHA BAISKELI KWA SIKU 30

Mwanamume huyo alisimamishwa baada ya kuendesha baiskeli kwa siku 30

Mwanamume mmoja nchini China ambaye alikuwa na matumaini ya kuendesha baiskeli hadi nyumbani kwao kusherehekea mwaka mpya, aligundua baada ya siku 30 kuwa alikuwa amepotea njia.

Mwanamume huyo alikuwa na matumaini ya kuwasil nyumbani kwao huko Qiqihar mkoa wa Heilongjian baada ya kuanzia safari yake huk Rizhao umbali wa kilomita 1,700.
Lakini alisimamishwa na polisi wa trafiki akiwa amepotea umbali wa kilomita 500 katika mkoa wa Anhui.
Wakati waligundua, polisi walimlipia tikiti ya treni ili arudi nyumbani.
Ripoti zinasema kwa mwanamume huyo alikuwa akilala maduka ya intaneti kwa sababu hakuwa na pesa.
Mwanamume huyo hakuwa na uwezo wa kusoma ramani na hivyo alikuwa akitegemea watu kumuelekeza.
Polisi walimsimamisha kwa sababu alikuwa akitumia barabara ambayo baiskeli haziruhisiwi barabarani.
Baada ya kugundua makosa yake, polisi na watu wote waliokuwa kituoni ambapo alisimama walichanga pesa na kumnunulia tikiti ili asafiri nyumbani

WAZAZI WALIOMCHARAZA MWALIMU VIBOKO WASAKWA

Mkuu wa Wilaya ya Kalambo, Julieth Binyura

MKUU wa Wilaya ya Kalambo iliyopo katika mkoa wa Rukwa, Julieth Binyura ameagiza kusakwa na kukamatwa mara moja wazazi waliomshambulia mwalimu wa Shule ya Msingi Kipanga, Musa Mkalambosa kwa kumcharaza viboko mbele ya wanafunzi wake.
Wazazi hao wenye hasira walimdhalilisha mwalimu huyo kwa kumcharaza fimbo wakimtuhumu kuwaadhibu watoto wao kwa kuwabebesha matofali bila idhini yao ambapo wamemsababishia maumivu makali mwilini. Shule ya Msingi Kipanga iko katika kata ya Samazi mwambao mwa Ziwa Tanganyika katika wilaya ya Kalambo.
Binyura alilazimika kuitisha kikao kilichowashirikisha wenyeviti wa vijiji , walimu na watendaji waliopo katika katika kata hiyo ambapo aliagiza wote waliotenda uhalifu huo wasakwe, wakamatwe na kuchukuliwa hatua kali za kisheria pamoja na kuagiza mwalimu huyo ahamishiwe kwenye shule nyingine wilayani humo.
Alisema mwalimu huyo ana uwezo wa kufanya kazi sehemu yoyote wilayani humo huku akilaani kitendo alichofanyiwa na wazazi ambacho ni cha udhalilishaji huku akiwataka wananchi na wazazi kuachana na tabia ya kuwadhalilisha walimu.
Mashuhuda walidai kuwa wazazi hao wenye hasira wakiwa na fimbo mikononi mwao walifika shuleni hapo hivi karibuni ambapo walimcharaza fimbo mwalimu huyo sehemu mbalimbali za mwili wake huku tukio hilo likishuhudiwa na wanafunzi wake pamoja na walimu wenzake.
Akizungumzia kisa hicho, mwalimu mkuu wa shule hiyo, Enock Majenga alisema baadhi ya wakazi wakiwemo wazazi walighadhabishwa na uamuzi na mwalimu Mkalambosa kuwaadhibu wanafunzi ambao hawakushiriki kusogeza matofali kwenye eneo ambalo choo cha shule hiyo kinajengwa.
Aliongeza kuwa mwalimu Mkalambosa wakati shule inafungwa aliwaagiza wanafunzi wawe wanafika shuleni hapo kwa ajili ya kusomba matofali na kuyapelekea eneo la ujenzi wa choo cha shule hiyo ambapo baadhi ya wanafunzi walikaidi na kutohudhuria.
Baada ya likizo kumalizika na shule kufunguliwa mwalimu Mkalambosa aliamua kuwaadhibu wanafunzi wote ambao walishindwa kufika shuleni hapo wakati wa likizo ambapo aliwaamuru kusomba matofali na kuyapekeleka kwenye eneo la ujenzi wa choo shuleni hapo.
“Ghafla kundi la wananchi, wengi wao wakiwa wazazi wa wanafunzi hao walifika eneo la shule na kumvamia mwalimu huyo na kuanza kumcharaza fimbo na kumsababishia majeraha sehemu mbalimbali za mwili wake,” alieleza.
Ofisa Elimu wa Kata ya Samazi, Daudi Sengo alikiri kutokea kwa mkasa huo ambapo ameshatoa taarifa wilayani akisisitiza kuwa mwalimu huyo amehamishiwa katika Shule ya Msingi Mbuza iliyopo wilayani humo .

Watu 14 walifukiwa mgodini Geita

Picha ya mtandao

Watu 14 wamefukiwa na kifusi juzi katika Mgodi wa Dhahabu wa Kampuni ya RZ Union Mining Ltd uliopo Kata ya Nyarugusu mkoani Geita, kutokana udongo kuporomoka na kuwaacha watu hao bila mawasiliano na hadi jana kutookolewa mtu yoyote.
Hata hivyo pamoja na sintofahamu hiyo juhudi za uokoaji zinaendelea kwa kasi, huku Mkuu wa Mkoa wa Geita, Ezekiel Kyunga akisema bado anayo imani kuwa watu hao wataokolewa wakiwa hai.
Mkuu huyo wa Mkoa alisema moja ya kazi iliyoendelea jana ilikuwa ni kwa vikosi vya uokoaji kuendelea kuchimba kifusi ili kutafuta njia ya kuwafikia waathirika huku mipira zaidi ya Oxygen ikiingizwa chini ya mgodi waliko watu hao ili kuwaongezea hewa.
Watanzania 13 na raia mmoja wa China walifukiwa na kifusi juzi usiku baada ya udongo kukatika na kuziba mlango waliokuwa wakitumia kuingia na kutoka. Mkuu wa Mkoa aliliambia gazeti hili jana kuwa hadi jana walikuwa bado hawajafanikiwa kuwafikia watu hao lakini kazi ya kuwafuata waliko inaendelea kwa kasi.
Akizungumza akiwa eneo la tukio, Kyunga alisema vyombo mbalimbali vya uokoaji kwa kushirikiana na wananchi walikuwa wanaendelea kuchimba kifusi ili kuwasaka mahali walipo mgodini.
“Kutokana na uzoefu wa kazi na matukio kama haya yaliyowahi kutokea tuna matumaini makubwa ya kuwaokoa wakiwa hai kutokana na mlango uliojiziba na udongo na watu hao wako katika mtaro wa mlalo hivyo kwa kutumia Oxygen tunayoingiza kwa mipira tutawakuta wakiwa hai,” alisema.
Kyunga alieleza kuwa watu wengi wapo katika eneo hilo wakiwemo ndugu wa waliofukiwa lakini kwa juhudi wanazoziona za uokoaji wametulia na kufuata maelekezo wanayopewa ikiwemo kukaa mita 500 kutoka eneo la tukio.
Alisema wametakiwa kukaa mbali na eneo hilo la uokoaji ili wasisongamane na watu wanaoendelea na uokoaji ili kuwapa fursa nzuri ya vikosi vyote kujadiliana namna ya kufanywa kwa ajili ya kufanikisha uokoaji huo.
Kwa upande wake Kamanda wa Polisi Mkoa wa Geita, Latson Mponjoli alisema juhudi za uokoaji zinaendelea kwa ushirikiano wa vikosi vya uokoaji vya Kampuni ya Geita Gold Mine (GCM), Jeshi la Zimamoto na Polisi pamoja na kikosi cha ukoaji cha Sekta ya Madini. Alisema hali ni shwari katika eneo la tukio na wana matumaini ya kuwafikia watu hao wakiwa hai.
Kampuni inayoendesha mgodi huo imesema kutokana na kitabu cha orodha ya watu wanaojiandikisha kuingia mgodini, kuna majina ya Watanzania 12 na Mchina mmoja waliofukiwa kifusini. Ilielezwa kuwa watu pia waliomshuhudia Mtanzania mmoja akingia mgodini humo bila kujiandikisha na hivyo kufanya waliofukiwa kufikia 14.

DC ALIYEJIUZULU ATUA DAR

*Ikulu yathibitisha
Na AGATHA CHARLES-
DAR ES SALAAM
MKURUGENZI wa Mawasiliano ya Rais-Ikulu, Gerson Msigwa, amethibitisha kujiuzulu kwa Mkuu wa Wilaya ya Uyui mkoani Tabora, Gabriel Mnyele.
Kupitia taarifa yake iliyoandikwa kwa kifupi na kutumwa kwa vyombo vya habari Dar es Salaam jana, Msigwa, hakutaja sababu ya Mnyele kuomba kujiuzulu bali alisema: “Ombi la Mnyele aliyeomba kujiuzulu wadhifa wake wa Mkuu wa Wilaya ya Uyui mkoani Tabora limekubaliwa na Rais Dk. John Magufuli. Nafasi ya Mkuu wa Wilaya ya Uyui mkoani Tabora itajazwa baadaye.”
Taarifa hiyo ya Ikulu ilitumwa jioni ya jana wakati asubuhi yake Mnyele alikuwa tayari ameshaondoka katika kituo chake cha kazi cha Uyui na kuja Dar es Salaam.
Gazeti hili lilipata taarifa na baadaye kuthibitishwa na Mnyele mwenyewe kwa njia ya simu kuwa alikuwa yuko safarini akitoka mkoani humo na angefika Dar es Salaam jana jioni akitumia usafiri wa ndege.
Alitoa taarifa hizo alipozungumza na gazeti hili saa tano asubuhi alipokuwa uwanja wa ndege akisubiri kupanda ndege na kumtaka mwandishi amtafute baada ya saa 10 jioni.
“Tayari niko Dar es Salaam nimeshatoka Uyui, huko nitarudi kukabidhi mwenzangu atakapoteuliwa,” alisema Mnyele.
Gazeti moja marufu nchini lilipotaka kujua sababu za kuchukua uamuzi huo, alisema ulikuwa ni uamuzi binafsi na alimweleza Rais Magufuli hivyo hawezi kuutaja hadharani.
“Uamuzi wa mteuliwa na anayeteuwa ni privacy (siri), hizo ni sababu binafsi, mimi au rais hawezi kuweka hadharani,” alisema.

DC ANUSURIKA KIPIGO ATOKA NDUKI

Mkuu wa Wilaya ya Chemba-Dodoma, Simon Odunga akila kiapo 

Sakata hilo ni baada ya DC huyo kuwataka wananchi wasilime mashamba yao kwa madai kuwa eneo hilo la ekari 500 linamilikiwa na mwekezaji. 

Baada ya mkuu huyo kuwatolea lugha chafu na kuamuru mwenyekiti wa kijiji akamatwe wananchi walijawa hasira na kuanza kuushambulia msafara wake. 

DC huyo alilazimika kukimbia baada ya gari lake kupigwa mawe

Pia baadhi ya viongozi wa wilaya akiwemo Mwenyekiti wa Halmashauri walilazimika kuvalishwa hijjab na kutoroka.

Aliyenyimwa nafasi ya kuenda chooni kulipwa dola milioni 1.3: Walimu wa TZ mpooo!!

Shule ilimuomba msamaha mwanafunzi na mama yake

Shule moja katika jimbo la California nchini Marekani imeamrishwa kumlipa dola 1.25 mwanafunzi wa zamani ambaye alienda haja ndogo kwenye ndoo baada ya kunyimwa nafasi ya kuenda chooni.

Jaji alitoa uamauzi huo kufuati kesi ambapo shule na mwalimu walishtakiwa kufuatia kisa hicho kilichotokea mwaka 2012.
Shule ilisema kuwa mwalimu hakuwa na nia ya kumkosea heshima mwanafunzi.
Mawakili wa shule walisema kuwa mwalimu alijaribu kutafuta suluhu, kwa kile alichofikiri kuwa sheria kali za wanafunzi kutopewa ruhusa ya kuenda chooni wakati wa masomo.
Mwanafunzi huyo wa shule ya Patrick Henry High School, ambaye sasa ana umri wa miaka 19, anasema kuwa mwalimu Gonja Wolf alikataa ombi lake la kutaka kuruhusiwa kuenda chooni.
Bi Wolf badala yake, alimuamuru mwanafunzi kutumia chumba kilichokuwa kando ambapo alikojoa kwa ndoo.
"Kisa kama hiki kamwe hakingefanyika kwa mwanafunzi wa umri wa miaka 14 ambaye alikuwa amejiunga na shule ya sekondani," wakili wa mwanafunzi alisema.
Kando na dola milioni 1.25, jaji pia aliamrisha mwanafunzi huyo kulipwa dola 41,000 kwa huduma za matibabu.
Mwalimu alipewa likizo na hakurudi shuleni humo baada ya kisa hicho.
Shule ilimuomba msamaha mwanafunzi na mamayake na kuwaeleza walimu kuwa nafasi za kuenda chooni zimeruhusiwa.

Albright asema ''yuko tayari kuingia usajili ya Waislamu''

  Madeleine Albright asema atajisajili kuwa Muislamu iwapo Trump ataanzisha usajili wa Waislamu Marekani

Aliyekuwa waziri wa maswala ya kigeni nchini Marekani na msanii wa Bing bang wameapa kujisajili kama Waislamu iwapo Donald Trump ataanzisha sajili ya waislamu pekee.

Mwanasiasa Madeleine Albright na Mayim Bialik walisema kuwa wako tayari kujisajili kuwa wafuasi wa dini hiyo ili kupinga hatua hiyo ya Trump.
''Nililewa kama Mkatoliki , nikawa Episcopalian na baadaye nikabaini kwamba familia yangu ilikuwa ya Kiyahudi'', Bi Albright, ambaye ni mwanamke wa kwanza kuwa Waziri wa maswala ya kigeni nchini Marekani alisema katika mtandao wake wa Twitter.
Chapisho hilo lilipendwa na maelfu ya watu.
Tamko lake lilijiri huku kukiwa na uvumi kuhusu agizo la rais ambalo litafanya ukaguzi wa kina, kupiga marufuku wakimbizi mbali na watu wanaoingia kutoka nchini humo kutoka mataifa saba ambayo yatashirikisha Syria,Yemen na Iraq.
Lakini hakujakuwa na usajili wa Wamarekani Waislamu katika miezi ya hivi karibuni, swala ambalo bwana Trump alisema atalitekeleza katika mahojiano mwaka 2015 kabla ya kukana kufanya hivyo.

SIRI NZITO DC KUJIUZULU

Na Mwandishi Wetu, Tabora
MKUU wa Wilaya ya Uyui mkoani Tabora, Gabriel Mnyele, amejiuzulu wadhifa wake, huku akiwa na siri nzito.
Mnyele ambaye kitaaluma ni mwanasheria msomi, amejiuzulu jana huku akiwa amedumu katika wadhifa huo kwa miezi minane tangu ateuliwe na Rais Dk. John Magufuli.
Hata hivyo hakuweka wazi sababu za kujiuzulu kwake.
Taarifa zinaeleza kuwa, jana Mnyele alikutana na Kamati ya Madiwani wa Chama Cha Mapinduzi (CCM), na kuwaaga rasmi kuwa yeye si mtumishi tena wa Serikali.

Akizungumza na MTANZANIA jana, Mwenyekiti wa Halmashauri ya wilaya hiyo, Said Ntahoni ambaye alihudhuria kikao cha madiwani wa Wilaya ya Uyui, alikiri kujiuzulu kwa Mnyele na kusema ameacha pengo kubwa katika wilaya hiyo.
“Ni kweli amejiuzulu nafasi hii tangu jana, amekuja mbele ya Kamati ya Madiwani CCM Wilaya, akatwambia amejiuzulu nafasi yake, japo hakuweka wazi sababu za kuchukua uamuzi huo.
“Aliwaambia wajumbe kwamba amemwandikia barua Rais Magufuli na ameridhia aachie ngazi…wajumbe wengi walibaki wameduwaa kwa sababu yeye ndiye mwenyekiti wa kamati ya ulinzi na usalama ya wilaya yetu… kwa kuwa ni uamuzi wake hatukuwa na namna tena.
“Tumekuwa naye kwa miezi nane hapa, ametusaidia katika mambo mengi, nguvu yake ilikuwa bado inahitajika kwa wanaUyui ambao amekuwa akifanya nao kazi za kila siku,” alisema Ntahoni.
Alisema pengo la Mnyele ni kubwa, lakini anaamini Rais Magufuli atawapelekea kiongozi mwingine mchapakazi ambaye watashirikiana nae kwa kila nyanja ili kuinua maendeleo ya wilaya hiyo.
MNYELE
MTANZANIA ilimtafuta DC Mnyele na alipoulizwa iwapo amejiuzulu nafasi yake, alianza kwa kusema. “Ndo nasikia kwako niko ofisini kwangu naendelea kuchapa kazi niliyotumwa na mamlaka za uteuzi.
“…unajua unapoteuliwa unatangazwa, unapotumbuliwa unatangazwa sasa taarifa hizo wewe umezitoa wapi?
“Ukitaka kujua suala hili, sehemu nzuri na ‘source’ wa uhakika mtafute Gerson Msigwa (Mkurugenzi wa Mawasiliano Ikulu), anajua ‘issue’ (suala) hili,” alisema Mnyele.
Hata hivyo Msigwa alipotafutwa kuzungumzia suala hilo, alisema hajapata taarifa zozote kutoka mamlaka zinazohusika juu ya kiongozi huyo kujiuzulu.
Wakati ikiwa haijulikani sababu za kujiuzulu kwake, taarifa nyingine zinasema Mnyele amefikia uamuzi huo kwa kile kinachodaiwa kuwa ni kutokana na kutingwa na majukumu yake binafsi aliyonayo.
Chanzo chetu cha uhakika, kinasema Mnyele aliandika barua ya kuomba kijiuzulu mwaka jana, kwa Rais Magufuli ambayo ombi lake limekubaliwa na amejibiwa juzi.
Baadhi ya watumishi wa halmashauri hiyo ambao hawakutaka kutajwa majina yao, waliiambia MTANZANIA kuwa jana asubuhi Mnyele alipita kila idara akianzia ofisini kwake kuaga wafanyakazi, huku akionekana kuwa ni mwenye furaha.
“Bosi wetu alianzia ofisini kwake kuaga watumishi, baadae alipita kila idara na kubwa ambalo alikuwa akieleza ni uamuzi ambao ameufanya yeye mwenyewe bila shinikizo.
“Bosi wetu kasema uamuzi wa kusitisha ajira yake hautokani na kushindwa kwendana na kasi ya Rais Dk. Magufuli, bali anataka kufanya kazi zake
binafsi,” alisema mmoja wa watumishi wa halmashauri hiyo.
Mkurugenzi Mtendaji wa Halmashauri hiyo (DED), Hadija Makuwani alisema yeye ni miongozi mwa watu walioagwa jana asubuhi na mkuu huyo wa wilaya.
Juhudi za kumpata Mkuu wa Mkoa wa Tabora, Aggrey Mwanri ili kuzungumzia suala hilo, hazikufanikiwa kutokana na kuwa wilayani Nzega kwa shughuli ya ukaguzi wa maghala ya kuhifadhia chakula.
CHANZO MTANZANIA

Al-Shabab washambulia kambi ya jeshi la Kenya nchini Somalia

Al-Shabab wamekuwa wakipigana dhidi ya serikali inayoungwa mkono na jamii ya kimataifa

Kundi la al-Shabab nchini Somalia limesema wapiganaji wake wameshambulia kambi ya jeshi la Kenya chini ya kikosi cha Umoja wa Afrika (Amisom) nchini Somalia.

Wapiganaji hao wanadai kuwaua wanajeshi wengi kwenye shambulio hilo katika kambi ya Kulbiyow kusini mwa Somalia karibu na mpaka wa nchi hiyo na Kenya.
"Mujahideen (wapiganaji) wawili walivurumisha magari yaliyokuwa na mabomu na kuyalipua kwenye lango la kambi hiyo ya mji wa Kulbiyow kabla ya wapiganaji wengine kuingia. Baada ya mapigano makali, tumefanikiwa kuiteka kambi," mmoja wa wasemaji wa al-Shabab Sheikh Abdiasis Abu Musab ameliambia shirika la habari la Reuters.
Msemaji huyo amedai kundi hilo limewaua wanajeshi zaidi ya 50 na kutwaa magari na silaha za wanajeshi hao, taarifa ambazo msemaji wa majeshi ya Kenya amekanusha.

Naye Kanali Paul Njuguna ameiambia Reuters: "Ni uongo. Operesheni ya kijeshi inaendelea. Tunaendelea kupokea taarifa."

Al-Shabab wamekuwa wakipigana dhidi ya serikali ya Somalia inayoungwa mkono na mataifa ya magharibi na jamii ya kimataifa.

Wanajeshi wa Kenya pamoja na wanajeshi kutoka Djibouti, Uganda na Ethiopia, chini ya Amisom, wamekuwa wakisaidia serikali hiyo yenye makao yake mjini Mogadishu.

Januari mwaka uliopita, wapiganaji wa al-Shabab walishambulia kambi yajeshi la Kenya ya el-Adde na kuua wanajeshi wengi.
Al-Shabab walisema waliua zaidi ya wanajeshi 100. Jeshi la Kenya halijatangaza idadi kamili ya wanajeshi waliouawa hadi wa leo.

Mfuasi wa Trump amshambulia Muislamu Marekani

Uwanja wa ndege wa JFK nchini Marekani

Mtu mmoja katika jimbo la Masachussets nchini Marekani ameshtakiwa kwa tuhuma za kutekeleza uhalifu wa chuki baada ya kumpiga teke mfanyakazi Muislamu katika uwanja wa ndege wa JFK pamoja na kumkaripia.

Robin Rhodes mwenye umri wa miaka 57 anatuhumiwa kwa kusema Trump....atawafukuza nyinyi nyote na baadaye akamzuia mwanamke huyo kutoondoka katika ofisi yake.
Kushambulia na kuwazuilia watu ni miongoni mwa mashtaka ya uhalifu wa chuki ambao mtu huyo kwa sasa anakabiliwa nayo, kulingana na hakimu wa Queens District.
Anakabiliwa na kifungo cha miaka 4 jela iwapo atapatikana na hatia.
Mfanyakazi huyo wa kampuni ya ndege ya Delta Airlines ambaye alikuwa amevaa hijab alikuwa ameketi katika ofisi yake siku ya Jumatano wakati Rhodes alipodaiwa kwenda katika mlango wake na kuanza kumkaripia, kugonga mlango, kumzuia kuondoka na kumpiga teke.
Wakati mtu mwengine alipoingilia kati na kumsaidia mwanamke huyo kutoka ofisini mwake, mtu huyo alidaiwa kumfuata na kupiga magoti mbele yake akiigiza maombi ya kiislamu.
''Islam na Isis, sasa Trump amewasili. Atawafurusha nyote. Unaweza kuuliza Ujerumani, Ubelgiji na Ufaransa kuhusu watu hao.utaona kilichojiri''.
Pia ameshtakiwa kwa kupiga kelele.

7 LUPANGO KWA WIZI WA M405 ZA SACCOs

Kamanda wa Polisi Mkoa wa Ruvuma, Zubery Mwombeji

 

WATUMISHI saba wa Halmashauri ya Mji wa Mbinga ambao ni wajumbe wa Bodi ya Chama cha Ushirika Mbinga Kurugenzi Saccos wamekamatwa na Jeshi la Polisi wakituhumiwa kuiba Sh 405,204,514 za wanachama wa chama hicho na kusababisha kishindwe kujiendesha.
Aidha, hatua hiyo ya kukamatwa kwa wajumbe hao ilitolewa na Mrajisi Msaidizi wa Vyama vya Ushirika mkoani humo, Biezery Malila baada ya kusomwa taarifa ya ukaguzi ya chama hicho iliyobainisha wizi wa fedha hizo katika Mkutano Mkuu Maalumu wa Wanachama uliofanyika Januari 21, mwaka huu mjini hapa.
Kamanda wa Polisi wa Mkoa huo, Zubery Mwombeji aliwataja watumishi hao saba waliowekwa mahabusu mpaka sasa kuwa ni Zackaria Lingowe, Emmanuel Mwasaga na Alex Kalilo ambao ni watumishi wa Halmashauri ya Wilaya ya Nyasa, Jamima Challe na Stella Mhagama wanatoka Halmashauri ya Mji wa Mbinga, Lucas Nchimbi na Mhadisa Meshack pia wa Halmashauri ya Wilaya ya Mbinga, ambao bado wanashikiliwa na Jeshi la Polisi wakiendelea kuhojiwa kutokana na tuhuma zinazowakabili.
“Kwa masikitiko makubwa ndugu zangu naomba niwaeleze kwamba mwenendo wa chama hiki sio mzuri kwa kuwa wajumbe wa bodi hii wameshiriki kwa namna moja au nyingine kukiuka taratibu,” alisema Mrajisi Malila.
Mrajisi huyo alifafanua kuwa fedha hizo ambazo wajumbe hao wanadaiwa kujinufaisha kwa matakwa yao binafsi, zilitokana na mkopo wa Sh milioni 500 uliotolewa na Benki ya CRDB kwa ajili ya kukopeshwa wanachama, lakini cha kushangaza waliamua kuzitumia kinyume cha taratibu husika.
Alimtaja mtuhumiwa mwingine ambaye sio mtumishi wa serikali kuwa ni Meneja wa Saccos hiyo Raymond Mhagama ambaye ametoroka huku akikabiliwa na kesi ya ubadhirifu aliyofunguliwa jadala Kituo kikuu cha Polisi Mbinga.

MKE AMVUNJA MGUU MUMEWE: WANAUME MPOOO

Na Walter Mguluchuma-Katavi
MKAZI wa Kijiji cha Uzega Tarafa ya Inyonga  wilayani  Mlele mkoani Katavi, Mashaka   Kianga,  amejeruhiwa vibaya mguu wake wa kushoto hadi kuvunjika, baada ya kupigwa na  rungu na mke wake mkubwa wakati  alipokuwa  akiamua ugomvi wa wake  zake, mkubwa na  mdogo waliokuwa wakigombea mifuko mitupu ya mbolea ya tumbaku.
Tukio hilo la mume kupigwa rungu na mke  wake mkubwa, lilitokea juzi saa nne asubuhi   katika Kijiji cha Uzega.
Mmoja wa mashuhuda wa tukio hilo, Abel Kalifumu, alisema kabla ya Mashaka  kujeruhiwa, aliwakuta wake zake wakiwa  wanapigana kugombania mifuko mitupu ya  mbolea ya tumbaku aina ya NPK.
Alisema ugomvi wa wanawake hao ulianza     baada ya mke mkubwa kumtaka mke mdogo  ampatie mifuko hiyo, hata  hivyo  mke  mdogo  alimkatalia ndipo ugomvi ulipoanza.
Kalifumu alisema wakati wanaendelea na   ugomvi, mume wao aliwakuta wanaendelea kupigana, jambo lililoonekana kumkasirisha.
Mashaka alichukua fimbo na kuanza  kuwacharaza viboko kwa  lengo la  kuwaamua, ndipo mke mdogo alivyoona viboko   vimemzidia aliamua kukimbia na kumwacha  mwezake eneo hilo. Ndipo mke mkubwa alifanya kweli kwa kumtandika mumewe kwa rungu na kumvunja mguu.

Maiti aliyezikwa Mbeya akutwa nyumbani

Kaimu RPC Mbeya Bw Lukula

JIJI la Mbeya limekumbwa na taharuki kwa siku mbili kutokana na tukio lililojiri katika Mtaa wa Igoma A kata ya Isanga, la mwili wa mtoto aliyekufa akiwa usingizini, kukutwa nyumbani baada ya wakazi wa mtaa huo kutoka makaburini walikokwenda kuuzika.
Mwili uliozua gumzo jijini hapa na kusababisha wakazi katika kila kona kuuzungumzia, ni wa mtoto Haruna Kyando (9).
Kwa mujibu wa mashuhuda, tukio hilo lilitokea juzi ambako majira ya asubuhi wazazi wa mtoto huyo, waliamka na kukuta mtoto wao amefariki na kisha kuwajulisha ndugu, jamaa na marafiki juu ya msiba uliowakuta; ambao kama ilivyo kawaida kwa misiba yote watu mbalimbali walikusanyika wakiwemo majirani.

Wanaume wasiojiandikisha kupiga kura kunyimwa tendo la ndoa Kenya

  Baadhi ya wanaume wakisajiliwa kama wapiga kura nchini Kenya kufuatia kuanzishwa kwa shughuli hiyo siku ya Jumatatu

Mbunge mmoja ametoa wito kwa wanawake waliopo katika maeneo yenye wafuasi wengi wa upinzani nchini Kenya kutofanya mapenzi na waume zao ambao hawajajiandikisha kuwa wapiga kura.

Kulingana na gazeti la The Standard nchini humo, mwakilishi wa wanawake mjini Mombasa Mishi Mboko amewataka wanawake nchini humo kuwanyima wanaume zao haki zao za ndoa ili kuwashinikiza waende kujiandikisha kuwa wapiga kura ili kujiandaa kwa uchaguzi wa mkuu ujao unaofanyika tarehe 8 mwezi Agosti 2017.
Akizungumza katika uwanja wa maonesho ya kilimo katika eneo la Mkomani Bi Mboko alisema kuwa ngono ni kifaa kizuri kinachoweza kuwashinikiza wanaume kukimbilia kujiandikisha katika shughuli hiyo ilioanza siku ya Jumatatu.
Kulingana na gazeti hilo hata hivyo, mumewe Mboko hatonyimwa haki hiyo ya ndoa kwa kuwa tayari amejiandikisha kuwa mpiga kura.

 

Mwakilishi wa wanawake mjini Mombasa Mishi Mboko

''Wanawake huu ndio mpango munaofaa kuutumia.Ni mpango muziri sana.Wanyimeni haki yao ya kufanya mapenzi hadi pale watakapowaonyesha cheti cha kupiga kura'', alisema.
Mboko aliongezea kwamba imefikia wakati ambapo wanawake wanafaa kutumia ngono kuwalazimisha waume zao kuchukulia shughuli ya usajili wa wapiga kura na umuhimu mkubwa.

Mwanamume aliyeishi na mkasi tumboni miaka 18 Vietnam

(Universal Images Group via Getty Images

Madaktari nchini Vietnam wametoa mkasi wa kufanyia upasuaji kutoka kwenye tumbo la mwanamume mmoja baada ya kukaa na mkasi huo kwa miaka 18.

Wataalamu wa upasuaji walisafiri kwa ndege kutoka mji mkuu wa Hanoi kusaidia katika upasuaji huo uliofanyika katika mkoa wa Thai Nguyen kaskazini mwa nchi hiyo.
Mgonjwa huyo wa umri wa miaka 54 alifika hospitalini baada ya kuhusika kwenye ajali ya barabarani mwezi jana.
Lakini baada yake kupigwa picha ikagunduliwa kwamba alikuwa na kifaa cha chuma chenye ncha kali sehemu ya kushoto tumboni.
Alipimwa tena katika hospitali iliyo karibu katika mkoa jirani wa Bac Kan na ikabainika bila shaka kwamba alikuwa na mkasi wa urefu wa sentimita 15 (inchi 6) karibu na utumbo wake mkubwa, gazeti la Tuoi linasema.

Kijana aliye na mkia afanyiwa upasuaji India

Kijana mwenye mkia nchini India afanyiwa upasuaji kuuondoa

Kijana mwenye mkia wa sentimita 20 unaomea chini ya uti wa mgongo wake amefanyiwa upasuaji ili uondolewe

Ulianza kutokea katika mgongo wa kijana huyo wa miaka 18 baada ya siku yake ya kuzaliwa ya 14.
Yeye na familia yake kutoka Nagpur nchini India walifanya swala hilo kuwa siri kwa sababu walikuwa na wasiwasi angechokozwa na wenzake.

Trump: Wafungwa hawafai kuachiliwa Guantanamo Bay

Guantanamo Bay hutumiwa kuwazuilia watu ambao Washington huwaita "wapiganaji maadui"

Rais mteule wa Marekani Donald Trump amesema wafungwa zaidi hawafai kuachiliwa kutoka kwa gereza la Marekani la Guantanamo Bay, Cuba.

Amesema wafungwa waliosalia gerezani humo ni "watu hatari sana na hawafai kuruhusiwa kurejea kwenye uwanja wa mapigano tena".
Rais Barack Obama alikuwa ameapa kuwa angefunga jela hiyo kabla ya kuondoka madarakani na amewahamisha wengi wa wafungwa waliokuwa wakizuiliwa humo.
Kwa sasa, wafungwa 60 wamesalia gerezani na ikulu ya White House ilisema baadaye Jumanne kwamba inapanga kuwahamisha wafungwa hao kabla ya tarehe 20 Januari.
Bw Trump alikuwa amepinga mpango wa Obama wa kufunga jela hiyo wakati wa kampeni.
Mwezi Februari alisema: "Asubuhi hii, nimemtazama Rais Obama akiongea kuhusu Gitmo, sawa, Guantanamo Bay, ambayo kusema kweli, ambayo kusema kweli, hatutaifunga.
"Tuaicha iendelee kutumika... na tutawarundika watu wale wabaya huko, niamini mimi, tutawaweka watu wengi huko."

NOMA: Mvumbuzi wa Ghana azindua magari yake ya kifahari

Gari la Katanka lilivumbuliwa na Kwadwo Sarfo

Mvumbuzi mmoja wa Ghana ameonyesha kile anachotaja kuwa uvumbuzi wake wa hivi karibuni unaoshirikisha magari katika maonyesho ya Kiteknolojia katika mji mkuu wa Accra.

Kwadwo Sarfo ,mwanzilishi wa taasisi ya kiteknolojia ya Katanka na mbaye pia ni kiongozi wa dini alionyesha gari alilotengeza aina ya V8, pikipiki za magurudumu matatu, mashine za roboti za kuchomelea vyuma miongoni mwa vinginevyo.

Ufilipino: Wafungwa wengi watoroka jela

 
Kundi la MILF lilitia saini mkataba wa kusitisha mapigano majuzi

Watu kadha wenye silaha wameshambulia jela moja kusini mwa Ufilipino na kusababisha kutoroka kwa zaidi ya wafungwa 150.

Washambuliaji hao wamemuua askari jela mmoja. Mfungwa mmoja naye alijeruhiwa
Maafisa wanashuku kuwa washambuliaji hao wana uhusiano na makundi ya Kiislamu yanayotaka kujitenga
Ufilipino, taifa ambalo lina Wakatoliki wengi, limekuwa likikabiliana na makundi yanayopigania kujitenga kwa maeneo ya kusini kwa miongo mingi

Bonge mwenye kilo 590 kukata nusu ya uzito

Bwana mmoja mwenye unene wa kilo 590 nchini Mexico amepanga kupnguza nusu ya uzito wake ifikapo mapema mwakani kwa lengo la kuinusuru afya yake ambayo umekuwa ikizorota kwa maradhi.

Mmexico huyo anayeminika kuwa mtu mwenye uzito mkubwa kabisa duniani, Juan Pedro, atafanyiwa upasuaji katika kipindi cha mwaka mpya ujao na kupunguza uzito wake kwa takribani nusu. Daktari wake, Jose Castaneda Cruz, amesema Pedro, mwenye uzito wa kilo 590 na anayekabiliwa na kisukari, shinikizo la damu na tatizo sugu la kupumua, anahitaji kupunguza uzito wake, kwa lengo la kuondosha athari za kiafya. Amesema mgonjwa wake huyo atapaswa kupitia hatua kadhaa kabla ya kufikia utaratibu kamili wa upasuaji, ambapo mchakato wake utatekelezwa katika hatua mbili ili kuweza kukabiliana na hatari kubwa za kiafya anazokabiliana nazo.
Matibabu kamili

Pedro ataondolewa zaidi ya robo tatu nyama za tumboni. Na sehemu nyingine ya tumbo itazibwa ili kumweka sawa. Aidha dokta huyo amesema atafanyiwa Upasuaji wa tumbo, kwa sehemu ya ndani. Daktari Castaneda anataka mgonjwa wake apunguze kilo 59 katika kipindi cha miezi sita ijayo, ambapo kwa kiwango hicho tu, anaweza kupunguza unene uliokithiri unaoweza kusababisha saratani kwa asilimia 52. Duru za kitabibu zinasema kwa ujumla, Juan Pedro mwenye umri wa miaka 32 ana fursa nzuri ya kupunguza nusu nzima ya uzito wake baada ya upasuaji wa kwanza katika kipindi cha miezi sita. Mwenyewe amenukuliwa akiwaambia waandishi wa habari "Taratibu lakini kwa uhakika, itafikia lengo".

Ndugu wawili wakutana baada ya miaka 40

Ndugu wawili wakutana katika kituo cha kuwatunza wazee, baada ya kupoteana kwa zaidi ya miaka 40. Unaapoisikia habari hii kwanza utafikiri imetungwa makusudi wakati huu wa X-Mas kwa jinsi inavyosisimua

Ndugu wawili wakutana baada ya miaka 40 katika nyumba ya wazee

Lakini si hadithi ya kubuni ni tukio la kweli tena lililotokea Desemba sita iliyopita-wenyewe Ujerumani wanaiita siku hiyo kuwa ni siku ya Nikolaus. Siku hiyo ya Desemba sita mnamo saa za usiku, Hedwig Horsch amekaa pamoja na wazee wenzake katika meza wakisubiri chakula cha usiku-mbele yake kulikuwa na bibi mmoja. Macho ya Hedwig hayakutulia yalimwandama bibi yule ambaye ni mgeni katika kituo chao cha kuwatunza wazee. Hedwig hakuweza tena kuvumilia, akapiga moyo konde na kumwendea yule bibi na kumuuliza anaitwa nani. Hapo hajawa na shaka yoyote: Mbele yake ameketi dadaake, Annelore ambae alifikiri amepotea-walionana kwa mara ya mwisho miaka 40 iliyopita MAMBO HAYO

Ndege zinazoangusha kinyesi angani kupigwa faini India

Ndege zinazoangusha kinyesi angani kuigwa faini India

Ndege nchini India zitakazoangusha kinyesi cha binaadamu kutoka angani zitapigwa faini ya Rupee 50,000 sawa na dola 736 mahakama imeamuru.

Mtu mmoja amelalama kwamba ndege zimekuwa zikiangusha uchafu huo kutoka chooni juu ya makazi ya watu karibu na uwanja wa ndege wa Delhi.
Vyoo vya ndege huweka uchafu wa chooni katika matangi maalum.
Matangi hayo hufunguliwa na uchafu huo kumwaga ndege inapotua.
Lakini mamlaka ya anga imekiri kwamba mtiririko wa uchafu huo hutokea angani ni  kwa bahati mbaya.
Mahakama sasa imeagiza shirika hilo la usafiri wa ndege kuhakikisha kuwa kwamba ndege haziangushi kinyesi cha binadamu kutoka anagani wakati inapotua ama mahala popte karibu na uwanja wa ndege.

Abiria wamripoti Rubani mlevi kabla ya ndege kuondoka, Watanzania je?

  Ndege hiyo ilitarajiwa kusafiri kutoka uwanja wa ndege wa Calgary Canada kuelekea nchini Mexico

Polisi huko Canada wamemkamata rubani mmoja aliyekuwa ndani ya ndege ya abiria kwenye chumba cha marubani akiwa amelewa chakari kwa mujibu wa vipimo alivyofanyiwa.

Rubani huyo alikuwa amepangiwa kuendesha ndege hiyo kwa safari ya kutoka uwanja wa ndege wa Calgary Canada hadi nchini Mexico ndipo lakini wafanyakazi wenzake wakamuona hakuwa katika hali sawa na kupiga ripoti.
Kisha punde baadae akaanguka na kuzirai.
Sasa amefunguliwa mashtaka ya kutaka kuendesha ndege akiwa mlevi na utovu wa nidhamu kazini.
Baadae rubani mwengine aliendesha ndege hiyo ya shirika liitwalo Sunwing iliyokuwa inaelekea Cancun mjini Mexico, ikiwa na abiria zaidi ya 100. 
Swali la kujiuliza ni Je kwa nini watanzania hawatoi taarifa ya madereva wa vyombo vya moto wanaokuwa wamelewa? na Je maji wanayokunywa madereva wakiwa safarini ni maji au pombe kali?

Brazil: Wafungwa 55 wauawa katika vurugu

 
Ulinzi uliimarishwa baada ya tukio hilo

Maafisa nchini Brazil wanasema wafungwa 55 wamepoteza maisha katika vurugu zilizotokea katika gereza moja nje ya mji wa Manaus.

Vurugu hizo katika gereza la Anisio Jobim zilianza siku ya Jumapili na kuisha baada ya saa kumi na saba pindi wafungwa hao waliposalimu amri.
Baadhi ya miili imekatwa vichwa huku mingine ikiwa imechomwa moto.
Mkuu wa usalama katika jimbo la Amazonas, Sergio Fontes, amewaambia waandishi wa habari kuwa vurugu hizo zilikuwa zimepangwa muda mrefu.
"kila kitu kinaashiria kwamba vurugu zilizotokea zilikuwa zimepangwa muda mrefu.

NYOKA AFA NA MTUWE

DUNIANI kuna mambo, ndivyo unaweza kusema kutokana na mkazi wa Mtaa wa Mateka, Manispaa ya Songea, Denis Komba (26) kufa baada ya nyoka wake aliyekuwa amembeba kwenye mfuko wa jaketi kuuawa na wananchi.
Komba alifariki dunia katika hospitali ya Rufaa Songea mkoa wa Ruvuma (Homso) ambako alilazwa baada ya watu wenye hasira kumuua kwa mawe na fimbo nyoka wake huyo.
Mashuhuda wanaeleza kuwa kabla ya wananchi kumuua nyoka huyo, Komba aliwasihi wasifanye hivyo kwa kuwa wakimuua na yeye angekufa, lakini ombi lake hilo halikusikilizwa.
Kwa mujibu wa mashuhuda wa tukio hilo, siku ya tukio Komba alikodi pikipiki ya Kassian Haule (24) ambaye ni mkazi wa Mpitimbi, yenye namba za usajili MC 724 AKB ili apelekwe nyumbani kwake mtaa wa Mateka.